ეროვნულ არქივსა და კინემატოგრაფიის ეროვნულ ცენტრს შორის მემორანდუმი გაფორმდება
საქართველოს იუსიტიციის სამინისტროს ეროვნულ არქივსა და კინემატოგრაფიის ეროვნულ ცენტრს შორის ურთიერთთანამშრომლობის მემორანდუმი გაფორმდა. დოკუმენტს ხელი მოაწერეს ეროვნული არქივის გენერალურმა დირექტორმა თეონა იაშვილმა და კინემატოგრაფიის ეროვნული ცენტრის ხელმძღვანელმა ნანა ჯანელიძემ.
„დღეს გაფორმდა მემორანდუმი, რომლის ფარგლებშიც ეროვნული არქივი და კინოცენტრი კიდევ უფრო ნაყოფიერად ითანამშრომლებენ. ამიერიდან ეროვნულ არქივში შეინახება კინოცენტრის დაფინანსებით გადაღებული კინოფილმების ციფრული ასლები, ამ ფილმების სცენარები, აღდგენილი ფილმების ფირები. ეს საშუალებას მოგვცემს, რომ ჩვენს შთამომავლობას შემოვუნახოთ მთლიანად ის კოლექცია, რომელსაც დღეს ქართული კინემატოგრაფია ქმნის კინოცენტრის დახმარებით”, – განაცხადა თეონა იაშვილმა.
აღსანიშნავია, რომ ეროვნულ არქივში 35 000-მდე კინოდოკუმენტი ინახება. კოლექცია მოიცავს დოკუმენტურ ფილმებს, კინოსიუჟეტებს, კინოქრონიკას, კინოჟურნალებსა და მცირე რაოდენობით მხატვრულ ფილმებს. კინემატოგრაფიის ეროვნული ცენტრის მიერ ეროვნული არქივისთვის გადაცემული მასალა ფასდაუდებელი შენაძენი იქნება არქივის კინოკოლექციისთვის.