პროექტისთვის „21-ე საუკუნის ქართული ლიტერატურული ნაწარმოების ეკრანიზაცია” განაცხადების მიღება 1 ივნისს შეწყდება. პირველ ეტაპზე მსურველებმა 21-ე საუკუნის ლიტერატურული ნაწარმოების მიხედვით შექმნილი სცენარები უნდა წარმოადგინონ. პროექტი კულტურისა და ძეგლთა დაცვის სამინისტროს, ეროვნული კინოცენტრისა და ქართული წიგნის ეროვნული ცენტრის ერთობლივი ძალისხმევით ხორციელდება. უკვე ცნობილია ჟიურის წევრთა ვინაობაც. იგი ცნობილი რეჟისორებით, კინომცოდნეეებით, სცენარისტებით და მწერლებით არის დაკომპლექტებული.
ჟიურის წევრები არიან: ნანა ჯორჯაძე, ლევან ბერძენიშვილი, ლევან თუთბერიძე, დავით ჩუბინიშვილი, ვაჟა გიგაშვილი, მანანა ანასაშვილი, ლელა ოჩიაური და დავით გაბუნია.
ჟიურის წევრებმა კონკურსის პირველ ეტაპზე 5 საუკეთესო სცენარის მოკლე ვერსია (ე.წ. თრითმენტი) უნდა შეარჩიონ, რომელთაც ეროვნული კინოცენტრი საკუთარი ხარჯით თარგმნის და უცხოელ კონსულტანტებთან ერთად განავითარებს. უცხოელი კონსულტანტები იზაბელ ფოვიე და ნიკოს პანაიოტოპულოსი სცენარისტებთან სამუშაოდ თბილისს 20 ივლისს ეწვევიან.