საქართველოში სამუშაო ვიზიტით პროექტის „კინო სკოლაში“ ბრიტანელი პარტნიორი მარკ ჰაიემი ჩამოვიდა

20 იანვარს საქართველოში პროექტის „კინო სკოლაში” პარტნიორი ბრიტანული ორგანიზაციის ხელმძღვანელი მარკ ჰაიემი ჩამოვიდა. ჰაიემი განათლების ექსპერტია, რომელიც წლებია უძღვება საერთაშორისო პროექტებს კულტურული განათლების მხარდასაჭერად.

მარკ ჰაიემი უკვე შეხვდა საქართველოს კულტურისა და ძეგლთა დაცვის და საქართველოს განათლებისა და მეცნიერების მინისტრებს, ხვალ კი იგი ეროვნული კინოცენტრის დირექტორს, პროექტზე მომუშავე ჯგუფს და კინოსპეციალისტებს შეხვდება.

“კინო სკოლაში” კინოგანათლების პოპულარიზაციაზე ორიენტირებული პროექტია, რომელიც მიზნად ისახავს მოზარდებში კრიტიკული აზროვნების და შემოქმედებითი უნარების განვითარებას. პროექტი საქართველოს კულტურისა და ძეგლთა დაცვის სამინისტროსა და საქართველოს განათლების სამინისტროს მხარდაჭერით მიმდინარეობს.

„კინო სკოლაში” 2014 წელს დაიწყო და თავდაპირველად 40 სკოლას მოიცავდა. ამჟამად კი პროექტში 168 სკოლა და საქართველოს ყველა რეგიონია ჩართული, მათ შორის საოკუპაციო ხაზთან მდებარე და მაღალმთიანი სოფლები. 2016 წელს პროექტმა “კინო სკოლაში” ევროკავშირის პროგრამის Creative Europe დაფინანსება მიიღო და მისი პარტნიორები ბრიტანული  ორგანიზაცია „FILM LITERACY EUROPE LIMITED” და ლიტვისა და ლატვიის კინოცენტრები გახდნენ.

პარტნიორებთან თანამშრომლობის შედეგად მოხდება საერთაშორისო გამოცდილების გაზიარება, ქართული და უცხოური ფილმების ვებ პორტალის შექმნა, სასწავლო მასალების მოწოდება, მიმდინარე პროცესების მუდმივი მონიტორინგი და პროექტის განვითარებისთვის სპეციალური რეკომენდაციების შემუშავება.